Newyddion

Cafodd gweithgareddau i’r holl deulu eu cynnal yn Nhy Newydd ar Ddiwrnod i’r Dewin. Bu’n ddiwrnod llwyddiannus iawn gyda tua 150 o ymwelwyr wedi dod draw i’r digwyddiad a gynhaliwyd yma ar ddydd Sadwrn, 16eg o Fai.

Cafwyd cyflwyniad diddorol a thaith o gwmpas y tŷ – cartref olaf Lloyd George, gan y bensaernïwraig, Frances Voelcker. Disgyblion ysgolion cynradd Cae Top - Bangor, Llanystumdwy a Chwilog fu’n diddanu’r gynulleidfa yn hwyrach yn y p’nawn.

Bu i ddisgyblion Ysgol Gynradd Cae Top ganu cân werin yng nghwmni Bardd Plant Cymru, Twm Morys a fu’n gweithio â nhw ar gyfansoddi’r gân mewn gweithdai yn Nhŷ Newydd ym mis Mawrth fel rhan o brosiect e-gefeillio Ewropeaidd.

Gwelwyd ffrwyth llafur disgyblion Ysgol Llanystumdwy yn dilyn eu hymweliad â’r Lon Goed ag ymweliad Mair Tomos Ifans â’r ysgol yn nechrau mis Mai. Cafwyd berfformiad gwerth chweil o’u straeon a’u chwedlau eu hunain wedi selio ar y Lôn yn ardal Eifionydd.

Gorffenwyd ar nodyn cerddorol gyda dwy ddawns unigol ac un ddawns grŵp draddodiadol gan ddawnswyr talentog Ysgol Chwilog.

Mewn digwyddiad mawreddog yng Nghanolfan Grefft Rhuthun ar nos Iau, 12fed o Fawrth, bu i Tŷ Newydd dderbyn tystysgrif rhagoriaeth mewn partneriaeth gyda Phartneriaeth Adeiladwyr Gogledd Cymru, dan arweiniad Carillion plc.

Bu i Bartneriaeth Adeiladwyr Gogledd Cymru sy’n cynnwys Carillion plc., Capita Symonds, Kier North West, R L Davies, Lawray, Wynne Construction, Chandler KBS, Russel Hughes Architects, Costain, Allwedd, Ellis Williams Architects, Corderoy ag R Ll Williams, ddarparu nawdd ar gyfer Creu Cysylltiadau / Reaching Out - prosiect arloesol e-gyfeillio Ewropeaidd ar gyfer ysgolion cynradd. Bu i Paul Pearson, Rheolwr Masnachol Carillion plc. a Sally Baker, Cyfarwyddwr Gweithredol Tŷ Newydd dderbyn eu tystysgrif gan Ieuan Wyn Jones a ddisgrifiodd y bartneriaeth yn ei araith agoriadol fel esiampl o sut y gall busnes a’r celfyddydau gydweithio er budd cymunedau lleol.

Mae Tŷ Newydd a Chyfnewidfa Lên Cymru wedi cyhoeddi manylion ar eu partneriaeth newydd ar gyfer sefydlu Tŷ Cyfieithu Cymru. Mae’r ddau sefydliad llenyddol, blaenllaw wedi dod at ei gilydd i roi hwb pellach i’r gwaith o gyfnewid llenyddiaeth rhwng Cymru a’r byd.

Wedi ei leoli yn Tŷ Newydd, bydd Tŷ Cyfieithu Cymru – Translators’ House Wales yn cynnal cyrsiau ar gyfer cyfieithwyr rhyngwladol sy’n awyddus i gyhoeddi gwaith o Gymru mewn gwahanol ieithoedd..  

Bydd cyfnodau preswyl yn cael eu cynnig i awduron tramor a chyfieithwyr llenyddiaeth Gymraeg yn ogystal â hyfforddiant i lenorion sydd am gyfieithu eu gwaith o’r Gymraeg i’r Saesneg.

Bydd cyfle hefyd i awduron a beirdd o Gymru dreulio cyfnodau dramor drwy rwydwaith rhyngwladol o dai cyfieithu ac ysgrifennu.

Mae partneriaeth arbenigol yn cael ei datblygu gyda rhwydwaith ryngwladol Halma sy’n hyrwyddo cyfnewid llenyddiaeth ar draws Ewrop, yn dilyn cais aelodaeth llwyddiannus gan y Gyfnewidfa Lên a Thŷ Newydd ym mis Rhagfyr 2008.

“Mae Tŷ Cyfieithu Cymru yn gam pwysig arall yn ein hymgyrch i gysylltu Cymru gyda’r farchnad gyhoeddi ehangach y tu hwnt i’r Deyrnas Unedig,” meddai Sioned Puw Rowlands, Cyfarwyddwr y Gyfnewidfa Lên sydd wedi ei leoli yn Sefydliad Mercator ym Mhrifysgol Aberystwyth.

“Mae rôl y cyfieithydd yn allweddol i’r gwaith o gyfnewid llenyddiaeth ar draws ffiniau ieithyddol ac er mwyn cyrraedd marchnad fyd-eang y mae’n hanfodol ein bod yn meithrin sgiliau cyfieithu yma yng Nghymru sydd eu hangen i hyrwyddo llenyddiaeth o Gymru ar draws y byd.” ychwanegodd.

Yn ôl Cyfarwyddwr Gweithredol Tŷ Newydd, Sally Baker, y mae’r bartneriaeth yn garreg filltir bwysig yn y gwaith o hyrwyddo llenyddiaeth Cymru ar y llwyfan rhyngwladol.

“Mae partneriaeth Tŷ Cyfieithu Cymru yn ddatblygiad unigryw a chyffrous. Mae’n cyfuno profiad helaeth a lleoliad godidog Tŷ Newydd gyda’r arbenigedd y mae Cyfnewidfa Lên Cymru wedi ei ddatblygu ym maes cyfnewid llenyddiaeth rhyngwladol.” meddai.

Caiff y cwrs cyntaf o dan faner Tŷ Cyfieithu Cymru ei gynnal ym mis Tachwedd 2009. Bydd y cwrs hwn yn canolbwyntio ar farddoniaeth.Bydd cyrsiau eraill yn y dyfodol ar ffuglen a ffurfiau llenyddol eraill.

Mae Cyfnewidfa Lên Cymru wedi ei leoli yn Sefydliad Mercator ym Mhrifysgol Aberystwyth. Eu hamcan yw hyrwyddo llenyddiaeth ac awduron o Gymru dramor gan gynnig grantiau cyfieithu i gyhoeddwyr:

Mae Cyfnewidfa Lên Cymru yn rhan o Sefydliad Mercator ym Mhrifysgol Aberystwyth. Mae amcanion a gweithgareddau’r Gyfnewidfa yn cynnwys hyrwyddo llenyddiaeth a llenorion Cymru dramor; cynnig grantiau cyfieithu i gyhoeddwyr; darparu gwybodaeth am awduron, cyfieithwyr a chyhoeddwyr; mynychu ffeiriau llyfrau rhyngwladol; cydweithio gyda gwyliau a digwyddiadau tramor, a bod yn rhan o brosiectau llenyddol rhyngwladol.